Sab nazaryein ki baat hai

Ek baadal ne dusre baadal se pucha

Yeh kya hai hamaari Zindagaani

Badal te rehte hai humaare roop rang 

Puri tarah se kuch ban nahi paatey 

Jaise ke woh nadi yah pahaad ko puri aakruti milti hai 

Humaari kyu nahi hai sthir zindagaani, koi ek astitva nahi 

Nadi ki ek disha hoti hai, aur uski saagar se milne ki manzil bhi

Hum to hava ke saath bhatakte rehte hai idhar udhar, koi ek disha nahi, koi ek manzil nahi

Humaara koyi ek thikaana nahi

Jaise suraj aur chand ke sthal hote hai

Humaara koyi ek ghar kyu nahi?

Surya bhi puri tarah se hum nahi samet sakte 

Aur usko humne chupa diya to log naaraz ho jaate hai

Paani bhi puri tarah se hum nahi sambhaal sakte 

Aur baarish hum barsaaye to log shikaayat karte hai

Surya ke to har roop logon ko pasand hai

Hum thode kya saavale ho jaaye to log udaas ho jaate hai

Chand ke saath hum luka chipi khele to bhi logon ko pasand nahi, unko to sirf us mah ki chamakti roshni se raaton ko sajaana hai 

Taare chup jaaye humaare peeche yah hum pahaadon ko gher de to bhi log niraash ho jaate hai

Yeh kya hai zindagi humaari 

Na idhar ki na udhar ki

Aisi adhuri hai yeh zindagi humaari

Phir dusre baadal ne pehle baadal se kaha

E humraahi

Yeh sab to nazaryein ki baat hai 

Humaare badal te roop rang ne kalaakaaro ko prerit kiya hai 

Chhote bacho ko behelaaya hai -unki kalpana mein hum kabhi ghoda kabhi mehel ban jaate hai

Koi ek pehchaan ke bagair hum aazaad reh sakte hai

Paahadon to ek jaga par hi ruke hue hai, nadi to ek disha mein hi jaa sakti hai

Hum to kahaan kahaan ghoom sakte hai har disha ka mahotva ley sakte hai 

Hava ke saath jhoom sakte hai

Koi ek ata pata nahi is liye hum swatantra se duniya fir sakte hai

Chaahe log naaraz ho lekin hum unhe Surya ki kachi dhoop se bachaate hai

Thandi raat mein hum unhe kambal pehnaate hai 

Badalte mausam ki chaitavni dete hai 

Jo log registaan mein rehte hai unhe to humaare “saavale” roop bhi megha ki aasha dilaate hai 

Haan hum paani ko pura samet nahi paate 

Par humaari baarish logo ki fasal ko badha ti hai 

Dharti ko sugandhit banaati hai

Mor ko nachaati hai, unke shaandaar pankh ka vistaar karvaati hai

Bache to is baarish mein khel kudte hai

Yeh mausam mein to parivaar ek saath chai aur bhajiye ke sang baatchit ke mazey karte hai

Aur premiyon to baarish mein aur kareeb aa jaate hai

Aur baarish ke baad hum Suraj ki kirnon ko aise phelaate hai ki

Swayam Indra ji unki dhanush ka pradarshan karte hai

Jo logon ko choka deti hai, rangeen sapne dikhaati hai

Jab hum chand ke saath luka chipi khel te hai to woh ek swaroop bhi aur rahasayapoorn dikhta hai,

Raat ko aur gahan banaate hai hum

Haan hum surya ko bhi pura samet nahi paate,

par har waqt me usey aur nikhaarte hai, 

suryast aur udaaya mein hum aur adheek rang ke parte laate hai, 

ek ek pal unke hum sawaar te hai

Hum to jadoogaar hai 

Paani ko bhi aur roop dete hai 

Jaise baarish yah baraf 

Har mausam ke bhaav hum prakat karte hai

Sab tatvon ke saath humaara parichit hai - vaayu, agni, paani, dharti, yah aakash 

Hum to us Aakash ko sajaate hai jiska koyi roop nahi

Saagar se bhi hum miltein hain

Unki boondein mein chipi gehariyon hum prithvi ke garbh tak pahunchaate hain 

Phir bhi

Hum hai bhi to sahi hai

Hum nahi to bhi sahi hai 

Aur humaare uppar havai jahaaj mein udhte hue logo ko puchon,

Pahaadon ki chotiyaan mein khadey hue logo ko puchon,

To voh to yahi kahenge,

Ki hum sab baadolon ke anokhein roop swaroop ek saath dekh te hue 

Unhe to aisa lagta hai ki woh jagat mein aagaye

Khwaabon ki duniya mein aagaye

Aur suno e humraahi 

Hum logo ko is duniya ki asthirta ki yaad dilaate hai

Unhe hum yeh kehete hai

Ki har waqt mein zindagi jeelo apni puri 

Varna to sab kuch aata jaata rehta hai 

Jeevan ke bhoj halke rakh kar unchaaiyon mein terna sikho 

Badalte fasl mein badalna sikho

Koyi ek pehchaan ko apna ghamand mat banaao 

Balki apnepan se dusro ki pehchaan ko aur hardik banaao

Ek ek lamha ko apna lo, zindagi jee lo har is pal mein

Waise bhi yeh pal, yeh lamha, yeh mausam, yeh aaj, yeh kal

Sab humaari thara guzarjaayenge 

E humraahi

Zindagi bhi to sirf apne apne nazaaryein ki pehchaan hai